اول شي تعذروني رح اتكلم بالعامي والعربي مخلوط
يوم 29 مايو يوم حافل
كنت مرتب له كيوم راحه لي لكن شائت الاقدار وصار يوم حافل بالعمل والحركة
فلم انم من الصباح الا تقريبا 5 دقائق
والسبب لم يكن لانه رح اسافر لكن ما كثرت الاشغال الا اخر يوم
يوم 29 مايو يوم حافل
كنت مرتب له كيوم راحه لي لكن شائت الاقدار وصار يوم حافل بالعمل والحركة
فلم انم من الصباح الا تقريبا 5 دقائق
والسبب لم يكن لانه رح اسافر لكن ما كثرت الاشغال الا اخر يوم
ودعت الشباب في العمل
ابو حسام وريان وبندر وخالد وسعود وفيصل ومروان
مع انه كان ودي اكمل مع ريان ونخلص من شغلنا 🙂
كان وداعي لهم بعد ما طلبوا اتغدى معاهم وانا وافقت يوم عرفت انه ببلاش
ما ألذ الاكل اللي ببلاش له طعم مميز 🙂
>> موجه لبندر
توجهت مباشرة بعد العمل إلى بيت الوالدين للسلام عليهم وتوديعهم
تفاجأت بطلب الوالد اصلح الجهاز قبل اسافر
واصلحت الجهاز ومشيت لبيتي بعد صلاة العصر
واو جاء وقت الراحه
تذكرت اني ما حلقت
و باقي اغراض تموينيه
و باقي ام عيالي وغاليتي مشوار بسيط
قلت في خاطري ساعتين وانا راجع اريح
للاسف خرجت وما رجعت الا بعد صلاة العشاء
فعلاً يوم حافل
عشان كذا انا اقول لكم توقع الاشياء اللي ما تتوقعها في اخر يوم لك قبل سفرك
توجيهات قبل السفر
من الافضل انك تصور جوازك وجواز العائلة وصورة من كرت العائله وتعطيها اهلك من باب الاحتياط.
* تتاكد من جوازك الف مرة ومن وقت الرحلة الفين مرة
تتاكد من الاوزان المسموحة لك على الطيران اللي حاجزها لك
تتأكد من البطاقات الائتمانيه هل تعمل ولا لا وهل فيها رصيد كافي
تتاكد من الكاش هل موجود معك او لا وتوزعه مابينك وبين رفيقك
تاخذ معاك كتب للدعوه للاسلام تكون مخصصه لغير المسلمين ولازم تحط في بالك ما تعطيها اي واحد ممكن الا شخص اخذت عليه او تكلم معاك عن دينك
للاسف انا هالنقطة اهملتها هالمرة جمعت الكتب وزودني زميلي فيصل ببعض المنشورات لكن للاسف نسيتها في السيارة وما شلتها معي.
بعدها خذ نفس عميييييق
وقبل الرحلة بثلاث ساعات تكون بالمطار إذا كانت رحلتك على الخطوط السعوديه. أو ساعتين ونص إذا كان طيران اجنبي.
والسبب انه البوردينغ على الخطوط السعوديه يكون زحمه. اما الخطوط الاجنبيه ما تكون زحمه.
شيل شناطك وتاكد انها كلها موجوده
انا جهزت شناطي وكل شي تمام حتى عربية بنتي اخذتها
كان التجهيز سهل الحمدلله لاني سافرت اكثر من مرة وعارف وش احتاج
ثلاث شناط كبار 26 كيلو + 26 كيلو + 30 كيلو
وشنطة صغيره 13 كيلو
ما شاء الله مليانه عزبه قهوة وشاي وتونه وقشطه و بسكوت وعصير وكل شي بالعربي بقالة متنقله 🙂
الوزن المسموح على اغلب خطوط الطيران هو 23 كيلو شحن و 7 كيلو داخل الطائره معاك
بعض خطوط الطيران يسمحون باكثر من كذا لانهم مقدمين عروض
وانت طالع من السعوديه يمشون الاوزان الزائده احياناً
لكن في العوده من اوروبا يلتزمون بالاوزان ولازم تدفع وزن زائد اذا كان فيه
المهم
مشينا للمطار وما قصر اخوي وصلنا وكلفنا عليه شوي بالمشوار
طبعاً انا مخطط اصور كل خطوه اسويها بس من الزحمات وامن المطار
والعمال اللي تارسين المطار وامن المطار اللي يهشونهم تقول غنم
للاسف يعاملون الناس كانهم مو اوادم حيوانات
ايش المشكله لو فهموهم بأدب بدون صراخ
المهم ما صورت شي
سالني موظف المطار بكل ادب لاني سعودي
والاجنبي المسكين يصارخ عليه وش ذنبه
قلت له انا رايح ميونخ على الطيران الالماني لوفثهانزا
قال لي تفضل
وادخل عفشي على السير
وادخل انا الا العسكري يقول الشناط وش فيها
وانا اقول له فيها اغراض 🙂 عفش
زين ما صفقني بشنطة
قال فيها جهاز قلت ايه فيها جهاز قهوة برجعه لالمانيا
مشينا للكاونترات
انا مسوي تشيك ان قبل اروح المطار
وجاهز البوردينغ معي
لكن للاسف قالوا لي نلغي لك البوردينغ اللي سويتها ونسوي لك جديد
يعني عطلوني ثلث ساعه وهم يسوونها
وبعد ما خلص بدأت ساعه الخرشه
الوزن وما ادراك ما الوزن
انا عارف ان الوزن زائد بس قلت ان شاء الله يمشوني
وزن الشناط قل ما ينفع الوزن زايد
قلت له وانا استهبل انا وزني نزل 15 كيلو احسبها مكانه
قال ايش
سكت وقلت زي اي سعودي يصير معاه الموقف يابن الحلال مشنا اليوم حنا عيال عم وقرابه بس 13 كيلو ما تضر
من هنا من هنا
لين الله هداه وعدى شنطتين وحسب علي الشنطة اللي وزنها 30 كيلو يعني 7 كيلو زياده دفعت مقابلها 580 ريال
والعربيه وكراسي السيارة طبعا مجاناً
بس انا اخذت عربيه فقط
اخذنا البوردينغ
واتكلنا على الله
ودخلنا الصالات
اول مرة الاحظ في الطيران الاجنبي موظفي جوازات كثير وما شاء الله خلصنا في دقيقتين فقط
ولاحظت تغير للافضل بالنسبة للجوازات وان شاء الله باقي مرافق المطار
دخلنا بمواجهة البوابات الخاصه للدخول الطائرات
واحلى شي في مطار الملك خالد ان البوابات كلها تشوفها
وكانت البوابه رقم 13 تنتظرنا على موعد الاقلاع 12:45 صباح يوم 30 مايو
قبل الاقلاع كان لازم بعض السناك وخاصه للاطفال لاني متوقع ينامون بالطيارة
سناك خفيف والحمدلله الاطفال اكلوا ولعبوا لين جاء وقت الصعود للطائرة
الاعلان عن الطائرة كان الصوت غير واضح
لكن كنا قريبين من البوابه
على فكرة الصالات كان فيها شغل تحسينات وتنظيم وان شاء الله نشوف الافضل
اول شي بيشيلون الفرش اللي كان موجود وبيحطون سيراميك ورخام
وغير كذا بيحطون ركن لالعاب الاطفال
ومكان كبير مخصص للاكل
وان شاء الله نشوف الافضل
بسم الله وصعدنا الطائرة
واخذنا مقاعدنا
على الخطوط الالمانيه لوفثهانزا
الطيارة واضح انها جديده
مقاعد مريحه نظام ترفيهي كويس ومهتمين باللغه العربيه
احسن شي الطياره ما فيها زحمه
يمكن تعدهم باصابع يدينك ورجولك ويدين ورجول واحد معاك (( زحمة صح )).ز
الطاقم كان كويس
تعاملهم جيد الموظف يبحث عن راحتك لدرجة انك تطفش من الراحه
جاب لعيالي العاب والوان وكراسه
للاسف وجباتهم ما كانت متوقعه بالشكل اللي شفته
بس ممكن يكون ماهو وقت وجبه رسميه عشان كذا ما كانت بالمستوى المأمول
انا كنت حريص ان تكون الوجبات حلال طلبت الوجبات الحلال اول ما حجزت التذكره عن طريق موقعهم.
واتصلت على مكتبهم وقال لي الموظف
كل الرحلات اللي طالعه من السعوديه واللي راجعه للسعوديه الاكل فيها حلال
في اثناء الرحله
اتاريهم يقدمون الشراب الله يهديهم
مع انه كانت عندي معلومات اي طيارة تصل للسعوديه لازم يكون ما فيها شراب.
كان فيه واحد جنبنا يشرب بيرة الله يكرمكم كثير فكنت خايف الرجال يسطل ويسوي شي بس الحمدلله كنت كل شوي اقرأ سورة الزلزله
بعد ثلاث ساعات من الاقلاع
صار شي ما توقعته
واحد الله يكرمكم يستفرغ وطاح اكثره من مره
انا اقول في نفسي الله يعيننا عليه شكله شرب لين قال بس
بعد لحظات الطاقم كله عنده
اتاري ارجال مريض
و الضغط مرتفع عنده وعطوه اكسجين
كان كل تفكيري وش بيصير هلى الطياره بتنزل في مطار على طريقنا ويسعغونه ولا وشلون
الحمدلله الرجال تحسن واموره زينه
وصلنا مطار ميونخ الدولي قبل وقت وصولنا بربع ساعه
الحمدلله يارب بدون منغصات لحد الان
دخلنا المطار وكنت عارف الدرب وين لاني زرت المطار اكثر من مره
توجهنا للجوازات
للاسف كان زحام شديد
مليان من الصينيين الله يكفينا شرهم
طولنا شوي قريب الربع ساعه
طبعا انا اخترت موظفه عشان زوجتي
وهم فاهمين هالشي
طلبت من زوجتي تكشف الغطاء
وسألتنا وين بتروحون ووين وجهتنا
قلت يومين في ميونخ والباقي في النمسا
لازم تكون اجابتك دقيقه وواضحه عشان ما تحرجك
وتسألك سؤال اخير
جاي هنا ليش
لازم تقول سائح
مو تقول جاي عشان اشتري سيارة وتصير خبل
انتهينا من الجوازات
باقي الشناط تنتظرنا
هالسنة العربيات مجاناً
العام كانت بيورو
بعد كذا اتجهنا لمكاتب التأجير
كنت حاجز عند شركة هيرتز لانهم مقدمين افضل عرض
كنت حاجز عن طريق موقع www.expedia.com
سعر الحجز 844 يورو لمدة 21 يوم مع 2 كراسي اطفال
BMW الفئه الثالثه
او مرسيدس سي 200
مفتوح الكيلوات
سألتني الموظفه وين بتكون وجهاتي
قلت لها
ألمانيا – النمسا – سويسرا – فرنسا وإيطاليا
قالت ما نقدر نعطيك مرسيدس و بي ام لانك بتروح ايطاليا وهناك تكثر سرقات هالنوع من السيارات
قلت طيب وش بتعطيني
قالت فيه فولفو ما ادري الظاهر الفئه السادسه منها
قلت اوكي
وحجزت المبلغ من البطاقة ومشيت اشوف السياره واخذها
لقيت جنوطها سود مثل كامري 2002 سعوديه مع عربجي لا وفوق هذا ستيشن واقن يعني بقس
رجعت وغيرتها لسيارة اعلى منها فولفو الفئه السابعه
اكبر واوسع وافضل وبقس بعد
شلت اغراضي
وسميت بالله وركبت القارمن وتوجهت للفندق
على امل انهم يعطوني الغرفه مثل هالوقت الساعه 8 صباحاً بدون دفع زياده
الفندق هوليداي ان اكسبرس ميسي ميونخ
سعر الليله اقل من 300 ريال
مواقف مجانيه ولو ما حصلت موقف فيه مواقف بفلوس خلف الفندق 6 يورو لليوم
افطار مجاني
الجو كان جميل
السيارة فيها فتحة سقف تعطي جو جميل وبديع
وصلنا الفندق
قوت مورقن بالالماني يعني قود مورنينق بالانجليزي يعني صباح الخير بالعربي
تفاجأت انهم خلصوا اموري في دقيقه ولا طلبوا مني شي ولا حتى الجوازات ولا حتى الكريدت كارد عشان يسوون بلوك لا وتقول لي تقدر تفطر الان مجانا وبكره الصباح لا والحمدلله الموقف مجانا
المهم دخلنا الغرفه بعد ما مرينا سوبر ماركت اشترينا لبنه و خبز بالحليب حلو جداً
ونوووووووم
نووووووم
لين الساعه 3 العصر بتوقيت المانيا
بعدها اتجهنا لمطعم دريا
مطعم جيد اكلهم لذيذ و حقه فيه
طلبنا الغداء
مشكل مشاوي وسط وصحن حمص و صحن سلطه و رز برياني و 2 مويه
بعد شوي جاني الطلب
وزيادة عليه صحن باميه وصحن سلطه زياده
سالته انا ما طلبت هذا قال لي لا هذا من عندنا زياده
اقول في نفسي لو القاها في الفاتوره ماني دافعها
تفاجات بالفاتوره كل شي سليم وسعر الغداء 52 يورو مع الضرائب
ممتاز
يعني بحدود 255 ريال
اتجهنا رجوعاً للفندق
لان الجو كان ممطر بعد ما طلعنا من المطعم
تمشينا شوي بالطريق
ورجعنا للفندق
وكان لازم اشغل شريحة موبايلي انترنت تجوال
والحمدلله شغلتها
قبلها رحت للاستقبال ابي انترنت ساعه كانت بسعر 8 يورو
تفاجأت انه قال لي مجانا لك
على فكرة شريحة موبايلي انترنت تجوال
سعرها 500 ريال لمدة شهر مفتوحة
تشتغل في المانيا وفرنسا والنمسا وباقي دول كثير بس اهم شي هالدول لي
انتظروني بكرة مع اكثر صور لاني راح اشغل الكاميرا
تكاليف هذا اليوم
سعر التذاكر : 11300 ريال
حجز السياره : 4750 ريال
عامل التحميل : 10 ريال
تغليف العربيه : 20 ريال
الوزن الزائد : 580 ريال
شريحة موبايلي : 500 ريال
سعر الفندق : 295 ريال
وجبه سناك : 24 ريال
وجبة غداء : 255 ريال
مياه شرب كبير : 7.5 ريال
موقف عند المطعم ساعتين : 9.75 ريال
المجموع لاول يوم : 17751.25 ريال
نراكم لاحقاً